ՏԵՍԱՆՅՈՒԹ․ Վրաստանում իշխանական պատգամավորը ջուր է լցնում ընդդիմադիր պատգամավորի վրա խորհրդարանի նիստում
Վրաստանի խորհրդարանի ընդդիմադիր պատգամավոր Գեորգի Վաշաձեի վրա ջուր են լցրել ելույթի ժամանակ, որում նա քննադատել է «Օտարերկրյա ազդեցության թափանցիկության մասին» սկանդալային օրենքը, որը նաեւ հայտնի է որպես օտարերկրյա գործակալների մասին օրենք: Այս մասին հայտնում է Sputnik Գրուզիա տելեգրամյան ալիքը։
«Ընդդիմադիր պատգամավոր Գեորգի Վաշաձեի վրա ջուր են լցրել Վրաստանի խորհրդարանի նիստում օտարերկրյա գործակալների մասին օրենքի քննադատության ժամանակ», - ասված է հաղորդագրության մեջ:
Նշվում է, որ վրացական ընդդիմության ներկայացուցչի հետ անհամաձայնություն է հայտնել իշխող «Վրացական երազանք-Ժողովրդավարական Վրաստան» կուսակցության պատգամավոր Իրմա Զավրադաշվիլին:
Մայիսի 28-ին Վրաստանի խորհրդարանը հաղթահարել է Հանրապետության Նախագահ Սալոմե Զուրաբիշվիլիի վետոն օտարերկրյա գործակալների մասին օրենքի վերաբերյալ: Ինչպես վկայում են քվեարկության արդյունքները, որոշումն ընդունվել է պատգամավորների ձայների մեծամասնությամբ: Օրինագիծը կընդունվի իր սկզբնական խմբագրությամբ։
