ՆԱՏՕ-ն Վաշինգտոնում հուլիսին կայանալիք գագաթնաժողովում կստեղծի մշտական կառույց, որը կկազմակերպի Ուկրաինային սպառազինության պարտադիր մատակարարումները և ֆինանսավորի դրանք, գումարի չափը դեռ որոշված չէ։ Այս մասին հայտարարել է ՆԱՏՕ-ի գլխավոր քարտուղար Ենս Ստոլտենբերգը:

Նա ելույթ է ունեցել ՆԱՏՕ-ի Խորհրդարանական վեհաժողովի նիստում։

«Ռազմական մատակարարումները պետք է կրկին շարունակական հոսքով գնան Ուկրաինա, անցյալի ձգձգումները և խոստումները չկատարելը լուրջ հետևանքներ են ունեցել: Սա է պատճառներից մեկը, թե ինչու առաջարկել եմ գագաթնաժողովում հաստատել ՆԱՏՕ-ի ավելի մեծ դերն ուկրաինական ուժերին համակարգում և օգնություն տրամադրելու և վերապատրաստելու հարցում: Մեզ պետք է ամուր ինստիտուցիոնալ կառույց։ Օգնության մասին ժամանակավոր, կարճաժամկետ կամավոր հայտարարությունները լավ են, բայց երկարաժամկետ հեռանկարում մեզ անհրաժեշտ է ավելի կանխատեսելի և լայնածավալ աջակցություն Ուկրաինային»,- ընդգծել է նա։

Ստոլտենբերգի խոսքով՝ բյուջեն դեռ համաձայնեցված չէ։