Դեյվիդ Կոպերֆիլդը մեղադրվում է սեռական ոտնձգությունների մեջ

Առնվազն 16 կին պնդում է, որ իլյուզիոնիստ և աճպարար Դեյվիդ Կոպերֆիլդը սեռական ոտնձգություն է կատարել իրենց նկատմամբ և իրեն ոչ ադեկվատ պահել։ Այս մասին հայտնում է The Guardian-ը, որի լրագրողները հետաքննել են միջադեպերը։

Կանանց խոսքով՝ իլյուզիոնիստն իրենց դրդել է իր հետ ինտիմ հարաբերություններ ունենալ։ Նա նաեւ ստիպել է մի քանիսին թմրանյութ ընդունել, որպեսզի չկարողանան դիմադրել։

Ինչպես նշում է The Guardian-ը, զոհերի նկարագրած իրադարձությունները տեղի են ունեցել 1980-ականների վերջից մինչև 2014թ: Այդ ժամանակ իրենց խոսքով՝ սեռական բռնության ենթարկված աղջիկների մեծ մասը դեռ հասուն տարիքի չէր հասել։

Իլյուզիոնիստի ենթադրյալ զոհերից մեկը՝ Բրիթնի Լյուիսը, դեռ 2018 թվականին հրապարակայնորեն հայտարարել էր, որ Կոպերֆիլդը թմրանյութ է տվել, ապա բռնաբարել իրեն 1988 թվականին։ Այդ ժամանակ, ըստ կնոջ, նա ընդամենը 17 տարեկան էր և աշխատում էր որպես մոդել։

Դրանից հետո մեկ այլ կին խոստովանել է, որ իլյուզիոնիստը նույն կերպ է վարվել իր և իր ընկերուոհւ հետ։ Տուժողի խոսքով՝ ինքը երբեք այս մասին հրապարակավ չէր խոսի, եթե վստահ չլիներ, որ իրեն թմրանյութ են տվել։

Մնացած դեպքերում կանայք ասում էին, որ աճպարարն իրենց անհանգստացրել է և իր ելույթների ժամանակ իրեն ոչ ադեկվատ պահել։ 15-ամյա տուժածներից մի քանիսի ծնողները նույնպես ականատես են եղել Կոպերֆիլդից ոտնձգություններին, գրում է Guardian-ը։

Կանանցից մեկը Կոպերֆիլդի արարքից հետո դիմել է ոստիկանություն, սակայն նրա հայտարարությունը «լուրջ չեն ընդունել», թեև սկանդալային ներկայացման տեսագրությունն առկա է եղել։ The Guardian-ի խմբագիրները կապվել են իրավապահ մարմինների հետ և աճպարարի փաստաբանների հետ՝ խնդրելով տրամադրել այդ կատարման տեսագրությունը, սակայն պատասխան չեն ստացել։

Հրատարակությունը նաև պարզել է, որ շատ դեպքերում իլյուզիոնիստն իր հետ մտերիմ հարաբերությունների մեջ մտնող աղջիկներին խոստացել է կարիերայի առաջխաղացում մոդելային բիզնեսում։

Ինքը՝ 67-ամյա Կոպերֆիլդը, հրատարակության հետ զրույցում հերքել է իր հասցեին հնչող նման մեղադրանքները։