ՏԵՍԱՆՅՈՒԹ․ Վիճելիս փայտերով և մահակներով հարվածել են քաղաքացուն, նա էլ կրակել է. մանրամասներ

Ոստիկանության Մասիսի բաժնի քրեական հետախույզները օպերատիվ տեղեկություն էին ստացել, որ մայիսի 11-ին ժամը 19.10-ին Մասիս քաղաքի Հերացու փողոցում հանդիպակաց երթևեկել են «ՎԱԶ-2112», «Շեվրոլե Վոլտ» և «Օպել» մակնիշի մեքենաներ, ինչից հետո «ՎԱԶ-2112»-ից և «Օպելից» իջել են մի խումբ անձինք և, հասարակության նկատմամբ բացահայտ անհարգալից վերաբերմունք ցուցաբերելով և հայհոյանքներ հնչեցնելով, փայտերով և մահակներով սկսել են հարվածել «Շեվրոլե Վոլտ» մեքենայում գտնվողներին, իսկ այդ ընթացքում գազային ատրճանակից կրակոցներ են արձակվել:

Ոստիկանությունից հայտնում են, որ Մասիսի քննչական բաժնում քրեական վարույթ է նախաձեռնվել:Ոստիկանության Մասիսի բաժնի ծառայողները ձեռնարկած օպերատիվ-հետախուզական միջոցառումների արդյունքում պարզել են խուլիգանության մասնակիցների ինքնությունը. ութ երիտասարդն էլ Կաթնաղբյուր գյուղի բնակիչ են:

Պարզվել է, որ նրանք անձնական հարցի շուրջ ծագած վիճաբանության ժամանակ փայտերով և մահակներով հարվածներ են հասցրել «Շևրոլե Վոլտի» վարորդին, նա էլ գազային ատրճանակից կրակոցներ է արձակել:

Դեպքի վայրի զննությամբ հայտնաբերվել է երեք պարկուճ:

Մայիսի 12-ին «ՎԱԶ-2112»-ի վարորդը՝ Կաթնաղբյուր գյուղի բնակիչ 22-ամյա երիտասարդը, հայտնաբերվել, ձերբակալվել և տեղափոխվել է ոստիկանության Մասիսի բաժնի ձերբակալվածների պահման վայր:

Մայիսի 13-ին հայտնաբերվել են նաև միջադեպի երկու մասնակից: Նրանք ձերբակալվել և ներկայացվել են Մասիսի քննչական բաժին: Երեք երիտասարդներին էլ մեղադրանք է առաջադրվել: Նրանց նկատմամբ դատարանի որոշմամբ կիրառվել է տնային կալանք խափանման միջոցը:

Նախաքննությունը շարունակվում է:

«Շեվրոլեի» վարորդը ներկայացրել է գազային ատրճանակը:

Ձեռնարկվում են միջոցառումներ՝ հանցագործության մյուս մասնակիցներին հայտնաբերելու ուղղությամբ: