ԼՈՒՍԱՆԿԱՐՆԵՐ. Բորբոս, կեղտի կուտակում. հացի 3 արտադրամասի գործունեություն է կասեցվել

Գավառում կասեցվել է «Գավառի հաց» ԲԲԸ-ին պատկանող երեք արտադրամասերի արտադրական գործունեությունը։ Տեղեկությունը հայտնում է ՀՀ սննդամթերքի անվտանգության տեսչական մարմնի մամուլի ծառայությունը։

Ստուգումներ են իրականացվել 4 տարբեր հացատեսակների արտադրամասերում, որոնցից 3-ում մի շարք խախտումներ են արձանագրվել։ Մասնավորապես, «Պուրի», «Թոնրի լավաշ», «Լավաշ» արտադրամասերում պատերի մակերևույթները պատրաստված չեն եղել անջրանցիկ, լվացվող և ախտահանող նյութերից, կանխարգելված չեն եղել առաստաղի կեղտի կուտակումը, բորբոսի առաջացումը, առաստաղից մասնիկներ թափվելու հնարավորությունը։ Բացի այդ, պարենային հումքի պահեստը ևս ունեցել է վերանորոգման կարիք։

Տեսչական մարմինը ժամկետ է սահմանել հայտնաբերված խախտումները վերացնելու համար։