Մենք ստիպված եղանք քայլեր ձեռնարկել և կատարեցինք այն քայլը, որը պահանջվում էր․ Էրդողան

Էրդողանը հայտարարել Է Իսրայելի հետ առևտրային հարաբերություններն ամբողջությամբ դադարեցնելու մասին։ Երկրների միջեւ ապրանքաշրջանառության ծավալը նա գնահատել է 9,5 մլրդ դոլար։

«Իսրայելի և Պաղեստինի միջև ծավալված իրադարձություններն անընդունելի են։ Մենք ստիպված եղանք քայլեր ձեռնարկել և կատարեցինք այն քայլը, որը պահանջվում էր։ Մենք ունեինք 9,5 մլրդ դոլարի առևտրաշրջանառություն, այժմ դադարեցրել ենք այն», — հայտարարել Է Թուրքիայի նախագահ Ռեջեփ Էրդողանը։

Թուրքիայի առևտրի նախարարությունը հայտարարել է, որ Իսրայելի հետ կապված արտահանման-ներմուծման գործողություններն ամբողջությամբ դադարեցվել են:

Գերատեսչությունը նշել է, որ Անկարան «խստորեն եւ վճռականորեն կկատարի այդ միջոցառումները այնքան ժամանակ, քանի դեռ Իսրայելի կառավարությունը թույլ չի տվել մարդասիրական օգնության շարունակական եւ բավարար հոսքը Գազա»:

Իսրայելի արտգործնախարար Իսրայել Կացը Էրդողանին մեղադրել է այդ որոշումից հետո միջազգային համաձայնագրերը խախտելու մեջ:

Թուրքիայի վիճակագրական ինստիտուտի տվյալներով՝ 2023 թվականին երկու երկրների միջև առևտրի ծավալը կազմել է 6,8 մլրդ դոլար, որի 76% - ը բաժին է ընկել թուրքական արտահանմանը։ Դեռ սեպտեմբերին Էրդողանն ու Իսրայելի վարչապետ Նեթանյահուն պայմանավորվել էին աշխատել այն «առնվազն 15 մլրդ դոլարի» հասցնելու ուղղությամբ։