ՏԵՍԱՆՅՈՒԹ․ Գերմանիայում ուսանողները ձեռքերն օճառելիս ծորակը փակում են, իսկ մեզ մոտ մինչև 300 լիտր չխշշա, չենք լվացվի. Փաշինյան
Կառավարության այսօրվա նիստի ընթաքում վարչապետ Նիկոլ Փաշինյանը հիշեց մի բլոգերի, ով պատմել էր, թե ինչպես է զարմացել՝ տեսնելով, թե Գերմանիայի համալսարանի ուսանողներն ինչպես են լվացվում։
«Չե՞մ պատմել կառավարության նիստում: Ռուսաստանցի բլոգեր էր, ասում էր՝ ամիսներով ուսումնասիրել եմ և նկատել, որ ուսանողները լվացվելիս ձեռքերն օճառելու ժամանակ ջուրը փակում են: Ասում եր՝ ես մի հոգու չեմ տեսել, որ ձեռքերն օճառելու ժամանակ ծորակը բաց պահի:
Պատկերացրի՞ք չէ, աշխատում է ոչ մի կաթիլ ջուր ավել չօգտագործի: Իսկ մենք, որ մի հատ լավ չխշշա, մի 300 լիտր ատամները լվանալու ժամանակ չօգտագործենք, չի լինի: Սա կրթության հարց է, մենթալիտետ է, որը ձևավորվել է մանկապարտեզում, դպրոցում և աշխատանքային հարաբերությունների մեջ:
Լավ հիշեցի: Մեր շատ քաղաքացիներ էլ նախընտրում են ջրաչափերի վրա մագնիս դնել: Մինչդեռ կարելի է նույն ֆինանսական էֆեկտին հասնել այլ ճանապարհով, միաժամանակ հարգանքի արժանի գործելակերպ որդեգրելով: Սա ուրիշի մասին չէ, սա մեր մասին է: Էնպես չէ, որ ես առավոտյան լվացվելիս ծորակը փակել եմ»,-ասաց Փաշինյանը:
