ՀՀ-ն կարող է ադրբեջանական գազ ստանալ. ձեռնտու կլինի ՀՀ-ի տարածքով գազատար կառուցել դեպի Նախիջևան. Ալիև

Ադրբեջանի նախագահ Իլհամ Ալիևը չի բացառում, որ Հայաստանը կարող է դառնալ ադրբեջանական գազի ստացող։

«Պոտենցիալ կերպով Հայաստանը կարող է լինել նաև ադրբեջանական գազի ստացող, հատկապես՝ հաշվի առնելով Վրաստանին մատակարարվող գազի խիստ արտոնյալ գինը, իսկ մերձեցման, ենթակառուցվածքների տեսանկյունից, բնականաբար, դա բնական կլինի ունենալ նման համագործակցություն»,- ասել է Ալիևը:

Ադրբեջանի նախագահի խոսքով՝ Զանգեզուրի միջանցքը դիտարկվել է ոչ միայն որպես երկաթուղային կամ ավտոմոբիլային հաղորդակցության միջոց, այլ նաև որպես հաղորդակցության գծերի պոտենցիալ երթուղի։

«Սա, պոտենցիալ, կարող է նույնիսկ գազատար լինել», - ասել է երկրի ղեկավարը։

Ալիեւն ասել է, որ Ադրբեջանը պայմանավորվածություն ունի Իրանի հետ Նախիջեւանին բնական գազ մատակարարելու վերաբերյալ։ Բացի այդ, Բաքուն ֆինանսավորում է եւս մեկ խողովակաշարի կառուցումը, որը Թուրքիայից ադրբեջանական գազը կմատակարարի Նախիջեւան։

«Բայց դա նման է աջ ձեռքով ձախ ականջիդ դիպչելուն, եթե այն անցնի Հայաստանի տարածքով, դա բոլորի համար ձեռնտու կլինի և մեծ գումար կխնայի»,- հավելեց նա։