Հերթական վանդալիզմը. Շուշիի Սուրբ Ղազանչեցոց եկեղեցու մոտ գտնվող գերեզմանատունը ոչնչացվել է
Շուշիի Սուրբ Ղազանչեցոց եկեղեցու մոտ գտնվող գերեզմանատունն ամբողջությամբ ոչնչացվել է։ Caucasus Heritage Watch կազմակերպությունը X–ի իրենց միկրոբլոգում է հրապարակել արբանյակից արված լուսանկարներ, որոնք վկայում են տեղի ունեցածը:
Կազմակերպությունից հիշեցնում են, որ Լեռնային Ղարաբաղում գերեզմանատան ամբողջական ոչնչացում 2020 թվականի պատերազմից հետո իրականացվում է արդեն երրորդ անգամ։ Բայց սա առաջին անգամն է ՄԱԿ-ի Միջազգային դատարանի որոշումից հետո, որը պարտավորեցրել էր Ադրբեջանին կանխել և պատժել հայկական մշակութային ժառանգության դեմ վանդալիզմի գործողությունները:
Գերեզմանոցում ավերածությունները սկսվել են 2023-ի հոկտեմբերին։ Կազմակերպությունն այդ մասին հայտնել էր նոյեմբերի 27-ին:
«Այն ժամանակ դեռ ուշ չէր կանխել գերեզմանատան ոչնչացումը։ Բայց մինչև 2023 թվականի դեկտեմբեր գերեզմանատունն արդեն գրեթե ոչնչացվել էր», - ասվում է CHW-ի հայտարարության մեջ:
Հայտարարությունում նշվում է, որ Լեռնային Ղարաբաղում ևս չորս վնասված գերեզմանատուն կա, որոնք ամբողջությամբ չեն ավերվել, բայց զգալիորեն վնասվել են։
«Հայկական գերեզմանների վրայով բուլդոզերներով անցնելը տարածում է գտնում Ադրբեջանում։ Այդ երկիրը որոշել է ոչնչացնել հողի պատկանելության և ժողովուրդների համակեցության պատմության մասին իր համար անհարմար վկայությունները»,–ասվում է հայտարարության մեջ:
