ՏԵՍԱՆՅՈՒԹ․ ՆԳՆ-ն պարզաբանում է Երևանի կենտրոնում ադրբեջանցի դիվերսանտի ձերբակալման մասին լուրերը
Սոցիալական ցանցերում տարածված տեղեկատվությունը, թե Երևանի կենտրոնում ադրբեջանցի դիվերսանտ է ձերբակալվել, չի համապատասխանում իրականությանը։
Auroranews-ի հետ զրույցում Հայաստանի ներքին գործերի նախարարության մամուլի խոսնակ Նարեկ Սարգսյանը հայտնեց, որ ապրիլի 8-ին՝ ժամը 23:25-ի սահմաններում, ՆԳՆ ոստիկանության ծառայողները Մաշտոցի պողոտա Ամիրյան փողոց խաչմերուկից թմրանյութ պահելու և օգտագործելու կասկածանքով ձերբակալել և ՆԳՆ ոստիկանության Կենտրոնական բաժին են տեղափոխել ՌԴ մի քաղաքացու:
«Նրա մոտ թմրանյութ չի հայտնաբերվել, պարզվել է, որ ՀՀ-ում է գտնվում տուրիստական նպատակով: Նա բաց է թողնվել»,- ասաց Սարգսյանը:
Հիշեցնենք՝ ավելի վաղ Luysi Banak տելեգրամյան ալիքը տեսանյութ էր տարածել, որտեղ պնդում էր, թե Երևանի կենտրոնում ձերբակալվածն ադրբեջանցի է։
