Խոսքը ՆԱՏՕ-ն գլոբալ դաշինքի վերածելու մասին չէ․ Ստոլտենբերգ
ՆԱՏՕ-ն նպատակաուղղված է Եվրոպայում և Հյուսիսային Ամերիկայում անվտանգության ապահովմանը, դաշինքը չունի ընդլայնվելու պլաններ՝ իր շարքերն ընդունելով աշխարհի այլ մասերից եկած երկրներին: Այս մասին Բրյուսելում կայացած մամուլի ասուլիսում հայտարարել է ՆԱՏՕ-ի գլխավոր քարտուղար Յենս Ստոլտենբերգը: Նրան հարցրել են Ասիա-խաղաղօվկիանոսյան տարածաշրջանի երկրների հետ դաշինքի շփումների մասին։
«Խոսքը ՆԱՏՕ-ն գլոբալ դաշինքի վերածելու մասին չէ։ ՆԱՏՕ-ն մնում է Հյուսիսային Ամերիկայի և Եվրոպայի դաշինք», - պատասխանել է նա։
Նրա խոսքով, ընդ որում, ՆԱՏՕ-ի երկրների անվտանգությունը կախված է նաև Ասիայի իրադարձություններից:
«Անվտանգությունը գլոբալ, այլ ոչ թե տարածաշրջանային հարց է», - հավելել Է դաշինքի գլխավոր քարտուղարը:
