Հայտնի է՝ ովքեր են Փաշինյանի հետ մեկնել Բրյուսել

ՀՀ վարչապետ Նիկոլ Փաշինյանը ապրիլի 4-ին Բելգիա է մեկնել 21–հոգանոց պատվիրակության հետ, որի կազմում է ընդգրկված նաև նրա կինը` Աննա Հակոբյանը։

Ըստ կառավարության կայքում հրապարակված ցանկի` բարձրաստիճան պաշտոնյաներից Բրյուսել են մեկնել ՀՀ փոխվարչապետ Տիգրան Խաչատրյանը, անվտանգության խորհրդի քարտուղար Արմեն Գրիգորյանը, ՀՀ արտաքին գործերի նախարար Արարատ Միրզոյանը, ՀՀ արտաքին գործերի նախարարի տեղակալ Վահան Կոստանյանը, Բելգիայի Թագավորությունում Հայաստանի Հանրապետության արտակարգ և լիազոր դեսպան Տիգրան Բալայանը, Ամերիկայի Միացյալ Նահանգներում Հայաստանի Հանրապետության արտակարգ և լիազոր դեսպան Լիլիթ Մակունցը։

Կառավարության կայքում հրապարակված ցանկն՝ այստեղ։ 

Այսօր՝ ապրիլի 5-ին նախատեսված է ՀՀ վարչապետի, Եվրոպական հանձնաժողովի նախագահ Ուրսուլա ֆոն դեր Լյայենի և ԱՄՆ պետքարտուղար Էնթոնի Բլինկենի եռակողմ հանդիպումը։ Այցի շրջանակում Փաշինյանը հանդիպում կունենա նաև ԱՄՆ Միջազգային զարգացման գործակալության ղեկավար Սամանտա Փաուերի հետ։