Իսրայելը ավիահարված է հասցրել Սիրիայի մայրաքաղաք Դամասկոսի հարավ-արևմտյան Ալ-Մեզզա շրջանում գտնվող շենքին: Դիվանագիտական առաքելության շենքը վնասվել է։

Առնվազն վեց մարդ Է զոհվել սիրիական մայրաքաղաքի արևմուտքում գտնվող Մեզզե թաղամասի ուղղությամբ իսրայելական օդուժի հրթիռային հարվածի հետևանքով, որտեղ գտնվում է Իրանի դեսպանատունն ու հյուպատոսությունը: Այս մասին հայտնել է Al Hadath հեռուստաալիքը։

Հեռուստաալիքի տեղեկությամբ՝ իրանական դիվանագիտական առաքելության համալիրի մոտակայքում գտնվում են առանձնատներ, որտեղ բնակվում են Իսլամական հեղափոխության պահապանների կորպուսի (ԻՀՊԿ, Իրանի ԶՈՒ էլիտար ստորաբաժանումներ) իրանցի ռազմական խորհրդականներ: Al Hadath-ը ենթադրում է, որ հարձակման թիրախը կարող էր լինել Սիրիայում գտնվող իրանցի սպաներից մեկը:

Ըստ հեռուստաալիքի, այս թաղամասում մի քանի պայթյուն է որոտացել, Դամասկոսի արևմտյան ծայրամասից երկինք է բարձրանում ծխի խիտ սյուն: Դեպքի վայր են ժամանել հրշեջ ջոկատները։