«Կրոկուսի» ահաբեկչությունից տուժածների թիվն աճում է

Կրոկուս Սիթի Հոլում տեղի ունեցած ահաբեկչության հետևանքով տուժածների թիվը հասել է 382-ի: Այս մասին հայտնում է ՏԱՍՍ գործակալությունը՝ հղում անելով Աղետների բժշկության կենտրոնին: Նրանց մեծ մասը ստացել է ամբուլատոր օգնություն։ Ավելի վաղ հայտնի էր դարձել 360 տուժածների մասին։

«Ճշտված տվյալներով՝ տուժել է 382 մարդ, այդ թվում՝ 9 երեխա։ Մեծ մասին՝ 217 տուժածներին, ցուցաբերվել է ամբուլատոր օգնություն։ Ավելի վաղ 165 մարդ հոսպիտալացվել էր, նրանցից 96- ն արդեն դուրս են գրվել», - ասել Է գործակալության զրուցակիցը։

Փոխվարչապետ Տատյանա Գոլիկովան ասել է, որ «Կրոկուս Սիթի Հոլի» այցելուները տեղի ունեցածից հետո շոկային վիճակում են եղել և անմիջապես չեն դիմել բժշկական օգնության: Այդ պատճառով բժշկական կազմակերպություններում տվյալների ճշտումից հետո տուժածների թիվն աճել է։ Զոհերի թիվը, վերջին տվյալներով, կազմում է 143 մարդ։

«Կրոկուսում» ահաբեկչությունը տեղի է ունեցել մարտի 22-ի երեկոյան։ Զինված անձինք կրակ են բացել այցելուների և աշխատակիցների ուղղությամբ։ Դրանից հետո նրանք այրել են շենքը և ավտոմեքենայով դիմել փախուստի։ Շուտով չորս հարձակվողները ձերբակալվել են։ Մարտի 24-ին դատարանը նրանց ձերբակալել էր մի խումբ անձանց կողմից ահաբեկչություն կատարելու մեղադրանքով։