Թուրքիան ցանկանում է նոր դարաշրջան սկսել ադրբեջանա-հայկական խաղաղության համաձայնագրի ստորագրմամբ․ Էրդողան
Ցանկանում ենք, որ Ադրբեջանի և Հայաստանի միջև խաղաղության համաձայնագրի ստորագրմամբ տարածաշրջանում նոր դարաշրջան սկսվի։ Այս մասին ասել է Թուրքիայի նախագահ Ռեջեփ Թայիփ Էրդողանը: Տեղեկությունը փոխանցում են ադրբեջանական լրատվամիջոցները։
Նա նշել է, որ Հարավային Կովկասում կայունության պահպանումը Թուրքիայի առաջնահերթություններից է։
Թուրքիայի նախագահը հույս է հայտնել, որ Արևելյան Միջերկրականում և Էգեյան ծովում Հունաստանի հետ հարաբերություններում վերջերս տեղի ունեցած բացասական մթնոլորտը կփոխվի, և որ ջանքերը կոնկրետ արդյունքներ կտան: Էրդողանը հավելել է, որ Թուրքիան միշտ աջակցում է այն քայլերին, որոնք ծառայում են Բալկաններում կայունությանն ու խաղաղությանը:
Երկրի ղեկավարը նշել է, որ Վաշինգտոնում ՆԱՏՕ-ի գծով Թուրքիայի դաշնակից ԱՄՆ-ի հետ կայացած ռազմավարական մեխանիզմի վերջին հանդիպմանը պայմանավորվածություն է ձեռք բերվել բարելավել համագործակցությունը: Նա նաև ասել է, որ Թուրքիայի անդամակցությունը Եվրամիությանը մնում է ռազմավարական նպատակ։
