Ֆրանսիայի բանակը բարձր ինտենսիվությամբ ռազմական հակամարտության է նախապատրաստվում

Ֆրանսիական բանակը պատրաստվում է բարձր ինտենսիվությամբ մարտական գործողություններ իրականացնել թշնամու դեմ, որն ունի նմանատիպ կրակային ուժ։ Այս մասին Politico-ի եվրոպական խմբագրությանը տված հարցազրույցում հայտարարել է Մայա-լե-Կանում մարտական պատրաստության կենտրոնի (CENTAC) ղեկավար, գնդապետ Ակսել Դենին։ Տեղեկությունը փոխանցում է Ведомости-ն։

«Աշխարհը բացահայտել է իր իրական էությունը. այն անկայուն է, վտանգավոր, և ոչ բոլորն են ընկեր», – նշել է Դենին:

Ուսումնական կենտրոնում պայմանները հնարավորինս մոտ են իրական մարտական ​​գործողություններին։ Այնտեղ վերարտադրվում է հրետանու դղրդյունը, ինչպես նաև նրա հարվածներից լուսային բռնկումները, ամենուր ցրված են աղմուկի ականներ, իսկ ռադիոկապը պարբերաբար ընդհատվում է առանց նախազգուշացման։

Պարբերականը գրում է, որ 120 քառ.կմ երկարությամբ ուսումնամարզական հավաքը յուրահատուկ է Ֆրանսիայի համար, քանի որ այնտեղ զորքերի տարբեր ճյուղեր՝ տանկային, հետևակային, հրետանային՝ կարող են մասնակցել համատեղ զորավարժություններին:

«Սպաները պոտենցիալ թշնամիներ չեն նշում, բայց զորավարժությունները նախատեսված են այն բանի համար, որպեսզի զինվորներին պատրաստեն պատերազմի այնպիսի հակառակորդի հետ, ինչպիսին Ռուսաստանն է», – ընդգծում Է Politico-ն:

Ֆրանսիայի նախագահ Էմանուել Մակրոնը փետրվարի 26-ին, ելույթ ունենալով Փարիզում Ուկրաինայի աջակցության գագաթնաժողովից հետո, չի բացառել ՆԱՏՕ-ի երկրների զորքերի ուղարկումն Ուկրաինայի տարածք: Այդ միջոցին ԵՄ երկրներից յուրաքանչյուրը կարող է ինքնուրույն գնալ, հավելել է նա։ Դրանից հետո Ֆրանսիայից մի քանի հակասական հայտարարություններ հնչեցին, մինչդեռ երկրի դաշնակիցները, ինչպիսիք են ԱՄՆ-ն ու Գերմանիան, հավաստիացրին, որ իրենք զորք չեն ուղարկի Ուկրաինա: Մարտի 8-ին Մակրոնը, հերթական անգամ պատասխանելով Ուկրաինա զորք ուղարկելու մասին հայտարարության մասին հարցին, ասել է՝ «ինչ-որ բան չբացառել, չի նշանակում դա անել»:

Ռուսաստանի ԱԳՆ-ն այս կապակցությամբ հայտարարել է, որ ՆԱՏՕ-ի երկրների զինծառայողները վաղուց արդեն գտնվում են Ուկրաինայում և օգնում են երկրի զինված ուժերին: Կրեմլում նշել են, որ Մակրոնի խոսքերն ընդգծում են Արևմուտքի երկրների անմիջական ներգրավվածությունն Ուկրաինական հակամարտությունում։