ԱՄՆ-ը 2022 թվականի վերջից պատրաստվում է մարտավարական կամ մարտական միջուկային զենքով Ռուսաստանի կողմից Ուկրաինային հնարավոր հարվածին։ Այս մասին հայտնել է CNN հեռուստաալիքը՝ վկայակոչելով նախագահական վարչակազմի երկու բարձրաստիճան աղբյուրների։ Տեղեկությունը փոխանցում է gazeta.ru-ն։

Նրանց խոսքով՝ համապատասխան որոշումն ընդունվել է վերլուծության, ընդհանուր առմամբ Ուկրաինայի շուրջ իրավիճակի ուսումնասիրության և նոր չափազանց կարևոր հետախուզական տվյալների հիման վրա: Հեռուստաալիքի զրուցակիցներից մեկն ընդգծել է, որ այդ տվյալները պարզապես հիպոթետիկ չէին, դրանք նաև հիմնված էին կոնկրետ տեղեկատվության վրա։

ԱՄՆ-ը պետք է պլաններ կազմեր լավագույնս պատասխանելու, եթե լինեին հարձակման և բուն հարվածի նախապատրաստման նշաններ։ Այսպիսով, ամառվա վերջից մինչև 2022 թվականի աշուն ԱՄՆ Ազգային անվտանգության խորհուրդը նման ծրագրեր մշակելու համար մի շարք հանդիպումներ է անցկացրել։

CNN-ը տեղեկացել է նաև, որ ամերիկյան ղեկավարությունը կապ է հաստատել Հնդկաստանի, Չինաստանի հետ և իրենց մտահոգությունները փոխանցել Մոսկվային:

Հեռուստաալիքի տվյալներով՝ ԱՄՆ պետքարտուղար Էնթոնի Բլինքենը նրանց մասին «ուղղակիորեն» տեղեկացրել է ՌԴ ԱԳ նախարար Սերգեյ Լավրովին, շտաբների պետերի միացյալ կոմիտեի ղեկավար գեներալ Մարկ Միլին հեռախոսով խոսել է գլխավոր շտաբի ղեկավար Վալերի Գերասիմովի հետ, իսկ ԿՀՎ տնօրեն Բիլ Բըրնսը արտաքին հետախուզության ծառայության ղեկավար Սերգեյ Նարիշկինի հետ զրույցի համար մեկնել է Թուրքիա: