Մոսկվայում Հնդկաստանի դեսպանատունը հաստատել է Ուկրաինայում հնդիկ քաղաքացու մահվան լուրը

Մոսկվայում Հնդկաստանի դեսպանատունը հաստատել է Հնդկաստանի 30-ամյա քաղաքացի Մուհամեդ Ասֆանի մահը, ով հավաքագրվել է ռուսական բանակ։

«Մենք կապի մեջ ենք մահացածի ընտանիքի և Ռուսաստանի իշխանությունների հետ»,- ասվում է չորեքշաբթի՝ մարտի 6-ին, դեսպանատան X սոցիալական ցանցի պաշտոնական էջում տեղադրված գրառման մեջ։ Դիվանագետները խոստանում են նաև «ջանք գործադրել» Ասֆանի աճյունը Հնդկաստան վերադարձնելու համար։

Ավելի վաղ մահացածի եղբայրը՝ Մուհամմեդ Իմրանը AFP-ին հայտնել էր, որ Ասֆանին ուղարկել են ուկրաինական պատերազմին մասնակցելու։ Վերջին անգամ Ասֆանը Դոնի Ռոստովից զանգել է եղբորը՝ հայտնելու, որ իրեն ռազմաճակատ են ուղարկում։ Ռուսական բանակում գտնվող Հնդկաստանի մեկ այլ քաղաքացի մահացածի ընտանիքին հայտնել է, որ Ասֆանը հրազենային վնասվածք է ստացել։

Մուհամմեդ Իմրանի խոսքով՝ իր եղբայրը «ծուղակն է ընկել» Youtube-ի «Baba Vlogs» ալիքում տեսանյութ դիտելուց հետո, որտեղ ասվում է, որ մարտական ​​գոտուց դուրս ռուսական բանակում աշխատող հնդիկները կկարողանան Ռուսաստանում մշտական ​​բնակության իրավունք ստանալ: 2023 թվականի նոյեմբերին գնալով Մոսկվա՝ Ասֆանը ռուսերենով պայմանագիր է ստորագրել, որից հետո անհետացել է։