Թաքեր Կարլսոնը կարող է ԵՄ պատժամիջոցների ենթարկվել Պուտինի հետ հարցազրույցի համար
Ամերիկացի լրագրող Թաքեր Կարլսոնը կարող է ներառվել ԵՄ պատժամիջոցների ցուցակում՝ ՌԴ նախագահ Վլադիմիր Պուտինի հետ հարցազրույցի համար։ Այս մասին Newsweek-ին հայտնել են Եվրախորհրդարանի ներկա եւ նախկին պատգամավորները։
Եվրախորհրդարանի պատգամավոր և Բելգիայի նախկին վարչապետ Գի Վերհոֆշտադի կարծիքով, ռուս առաջնորդի հետ հարցազրույցը կարող է Կառլսոնին թիրախ դարձնել ԵՄ օրենսդիրների համար։ Նա կարծիք է հայտնել, որ լրագրողը «նախկին նախագահ Դոնալդ Թրամփի և Վլադիմիր Պուտինի խոսափողն է»։ Վերհոֆշտադը հավելել է, որ ԵՄ-ն պատժամիջոցներ է սահմանում «բոլորին, ովքեր օգնում են» Ռուսաստանի առաջնորդին։ «Տրամաբանական կլիներ, որ Եվրոպական արտաքին գործողությունների ծառայությունը ուսումնասիրեր նրա գործը»,- ասել է եվրոպացի պատգամավորը։
Եվրախորհրդարանի նախկին պատգամավոր Լուի Գարիկանոն համաձայնել է Վերհոֆշտադի հետ՝ ասելով Newsweek-ին, որ Կառլսոնն այլևս չի կարող լրագրող համարվել, քանի որ նա դարձել է «քարոզիչ»:
Իր հերթին, մեկ այլ եվրոպացի պատգամավոր Ուրմաս Պաետը, մեկնաբանելով հարցազրույցը, ասել է, որ Ռուսաստանի իշխանությունների դիրքորոշումը խթանելու համար «կարող եք հայտնվել պատժամիջոցների ցուցակում»։ «Դա առաջին հերթին վերաբերում է ԵՄ երկրներ մուտքի արգելքին»,- եզրափակեց Պաետը։
