Գործող օրենսդրությունը որևէ մեկին չի արգելում ազատորեն ընտրել իր զուգընկերոջը. ՔՊ պատգամավոր
Ազգային ժողովը շարունակում է քննարկել ՔՊ-ական կին պատգամավորների ներկայացրած նախագիծը, որով արգելվում է կուսության ստուգումը, նաև ընտանիքի սահմանումն ընդլայնվում է ու ավելանում են զուգընկեր և զուգընկերուհի հասկացությունները:
«Հայաստան» խմբակցության պատգամավոր Գեղամ Նազարյանը հետաքրքրվեց` ինչո՞ւ սահմանված չէ, թե ով է զուգընկերը:
«Ցավոք սրտի, ապրում ենք մի ժամանակահատվածում, երբ կան հայտնի այլ զուգընկերներ, ես առաջարկում եմ, որ հստակ նշվի` զուգընկերն արական ու իգական սեռի է, որովհետև արդեն քայլ է գնում դեպի մյուս փուլ»,- ասաց Նազարյանը։
Նախագծի համահեղինակ Զարուհի Բաթոյանն ի պատասխան ասաց՝ իրենք իրավասու չեն սահմանել, թե մարդիկ ում են ընտրում իրենց զուգընկեր:
«Ում էլ ընտրեն, ով էլ լինի այդ զուգընկերը` արգելվում է բռնությունը: Մենք չենք սահմանելու խտրականություն, ավելին, ես հույս ունեմ, որ շուտով կառավարությունը բերելու է հավասարության մասին օրենքը, որտեղ արգելված է բոլոր հիմքերով խտրականությունը»,- ասաց պատգամավորը:
Գեղամ Նազարյանը նշեց՝ եթե անձը ազատ է իրեն զուգընկեր ընտրելու նույն սեռի ինչ-որ մեկին` այլևս իրենց պաշտպանության ներքո չեն գտնվելու:
«Դա արդեն ուրիշ բան է, բառերով չասեմ՝ ինչ է»,- հավելեց նա:
Բաթոյանն էլ հակադարձեց, թե մեր գործող օրենսդրությունը, գործող Սահմանադրությունը որևէ մեկին չի արգելում ազատորեն ընտրել իր զուգընկերոջը:
