«Չգիտեք՝ ձեր կողքը նստած պատգամավորներն ինչ սեռական կողմնորոշում ունեն»․ «Կարգի հրավիրեք»․ բանավեճ ԱԺ-ում

ՔՊ-ական պատգամավոր Հասմիկ Հակոբյանը շատ վտանգավոր է համարում ընդդիմադիր պատգամավոր Գեղամ Նազարյանի հայտարարությունը, որ իրենք չեն պաշտպանի այն մարդկանց, ովքեր նույն սեռի զուգընկեր են ընտրում: Այս մասին ԱԺ-ում հայտարարեց Հակոբյանը։

«Դուք այս ամբիոնից ասում եք` եթե մարդն ավանդական սեռական կողմնորոշում չունի, կարելի է իրեն ծեծել, բռնություն գործադրել»,- ասաց նա:

Ըստ նրա` ոչ մեկ չգիտի, թե իր կողքինն ինչ կողմնորոշում ունի:

«Պարոն Նազարյան, դուք չգիտեք, թե ձեր ֆրակցիայում ով ինչ կողմնորոշում ունի, ձեր կողքը նստած պատգամավորներն ինչ կողմնորոշում ունեն»,- ասաց Հասմիկ Հակոբյանը:

«Հայաստան» խմբակցությունից Արթուր Խաչատրյանն այս արտահայտությանը պատասխանեց՝ նշելով՝ «Կարգի հրավիրեք»:

Հակոբյանն ի պատասխան ասաց. «Պարոն Խաչատրյան, մենք էլ չգիտենք, թե մեր խմբակցությունում ով ինչ կողմնորոշում ունի, պետք չէ այստեղից լեգիտիմացնել բռնությունը ու մեսիջ հղել, որ ոչ ավանդական սեռական կողմնորոշում ունեցող քաղաքացիներին կարելի է ցխել»:

Հիշեցնենք, որ քննարկվում էր ՔՊ-ական կին պատգամավորների` Զարուհի Բաթոյանի, Սոնա Ղազարյանի և Ծովինար Վարդանյանի ներկայացրած «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում փոփոխություններ և լրացումներ կատարելու մասին նախագիծը։ Ըստ այդ նախագծի` արգելվում է կուսության ստուգումը։ Նաև` ընտանիքի սահմանումն ընդլայնված է ու ավելացել են զուգընկեր և զուգընկերուհի հասկացությունները: ՔՊ-ականների գնահատմամբ` oրենսդրական արգելքը ֆիզիկական բռնության մասին է, իսկ կուսության ստուգումը, ըստ նրանց, նույնպես ներառվում է ֆիզիկական բռնության մեջ։

Նախագիծը քվեարկությամբ ստացավ 63 կողմ, 32 դեմ , 1 ձեռնպահ ձայն: