ՔՊ ղեկավարը մեկնաբանել է Փաշինյանի` կարմիր զգեստով ցուլերի միջով անցնելու մասին հայտարարությունը
Վարչապետ Նիկոլ Փաշինյանի` կարմիր զգեստով ցուլերի միջով անցնելու մասին հայտարարությունն ալեգորիկ օրինակ է ու բոլորովին չի նշանակում ինքնությունից հրաժարվել: Այս մասին ԱԺ-ում լրագրողների հետ զրույցում պնդել է ՔՊ խմբակցության ղեկավար Հայկ Կոնջորյանը։
«Իմ համոզմամբ, այո, ինքնությունը նա է, ինչ որ ստացել ենք ժառանգություն, բայց ինքնության ամենակարևոր բաղադրիչն այն է, ինչը մենք ձևավորում ենք նաև մեր վարքով: Ինքնությունը նաև այն է, ինչը մենք ձևավորում ենք աշխարհի հետ մեր հարաբերության մեջ, որովհետև, եթե աշխարհը մեզ մի մարտահրավեր է տալիս ու մենք, անտեսելով այդ մարտահրավերը, մրցունակ չենք լինելու»,- ասել է Կոնջորյանը:
Նա նշել է, թե տարածաշրջանում մարտահրավերներին դիմակայելու համար պետք է մեր ներքին կանոնները, Սահմանադրությունը վերաիմաստավորենք:
Կոնջորյանը հավելել է, որ ժողովուրդն է որոշում` ով է իշխանությունը, ով է վարչապետը: «Նիկոլ Փաշինյանը Հայաստանի ընտրված վարչապետն է, ժողովուրդն է ձևավորել իշխանությունը ու միայն ժողովուրդը կարող է փոխել»,- ընդգծել է նա։
