Լուկաշենկոն զինվորականներին թույլ է տվել կրակել քաղաքացիականներին
Բելառուսի առաջնորդ Ալեքսանդր Լուկաշենկոն փոփոխություններ է կատարել երկրի զինված ուժերի կանոնադրություններում, որոնց համաձայն զինծառայողներին թույլատրվում է քաղաքացիների դեմ կիրառել «հրազեն, հատուկ միջոցներ, մարտական եւ Հատուկ տեխնիկա իրենց վրա դրված խնդիրները կատարելիս»:
Քաղաքացիների դեմ զենքի կիրառումը, ըստ փաստաթղթի, թույլատրվում է նույնիսկ նրանց կողմից վարչական իրավախախտումներ կատարելու դեպքում։
Լուկաշենկոյի կատարած փոփոխությունների մեջ նաև ասվում է, որ զինծառայողը «պատասխանատվություն չի կրում կրակոցների հետևանքով պատճառված վնասի համար», երբ այն «իրականացվել է համազորային կանոնադրությունների պահանջներին համապատասխան»:
Ավելի վաղ Լուկաշենկոն ստորագրել էր «Պետական անվտանգության մարմինների մասին» օրենքում կատարված փոփոխությունները, որոնց համաձայն հատուկ ծառայությունների աշխատակիցներին թույլատրվում է զենք կիրառել կանանց, երեխաների եւ հաշմանդամների դեմ՝ «նրանց կողմից զինված դիմադրություն ցույց տալու, զինված կամ խմբակային հարձակման կամ մարդկանց կյանքին կամ առողջությանը սպառնացող այլ գործողությունների դեպքերում»:
