Զելենսկին՝ Ուկրաինայում բռնի մոբիլիզացիայի դեպքերի մասին

Ուկրաինայի նախագահ Վլադիմիր Զելենսկին խոստովանել է, որ ուկրաինական զինկոմիսարիատները զբաղվում են քաղաքացիների հարկադիր մոբիլիզացիայով։ Այս մասին գրում է ՏԱՍՍ-ը՝ վկայակոչելով Զելենսկու հարցազրույցը գերմանական ARD հեռուստաալիքին։

«Այո, կան դեպքեր, երբ զինկոմիսարիատների ներկայացուցիչները շրջել են փողոցներով և փնտրել տղաների, որոնք չեն եկել զինկոմիսարիատներ։ Արդյոք դա ճի՞շտ է: Բացարձակապես ոչ, նրանք չպետք է դա անեն»,- հայտարարել Է Ուկրաինայի նախագահը։

Քաղաքական գործչի խոսքով՝ ինքը խնդրել է Ռադային և զինվորականներին հաշվի առնել այս փաստերը մոբիլիզացիայի մասին նոր օրինագիծ պատրաստելիս՝ ապագայում նման դեպքերը կանխելու համար:

Բռնի մոբիլիզացիայի դեպքերի մասին ավելի վաղ հաղորդվել էր Ուկրաինայի մի շարք շրջաններում: Տեղեկություններ են հայտնվել նաև տրոլեյբուսներում ծանուցագրեր բաժանելու մասին։