Բաքուն հետաձգել է Նիդեռլանդների ԱԳՆ ղեկավարի այցը Ադրբեջան. հայտնի է պատճառը

Բաքուն հետաձգել է Նիդեռլանդների արտաքին գործերի նախարար Հանկե Բրյուինս Սլոթի այցը Ադրբեջան: Այս մասին հայտարարել է Ադրբեջանի ԱԳՆ մամուլի ծառայության ղեկավար Այհան Հաջիզադեն՝ մեկնաբանելով Նիդեռլանդների ԱԳՆ ղեկավարի՝ խորհրդարանում արած հայտարարությունները։

Նրա խոսքով՝ հերթական անգամ նիդեռլանդցի պաշտոնյան հանդես է եկել մեղադրական հայտարարություններով՝ ակնհայտորեն խեղաթյուրելով ադրբեջանական կողմի հայտարարությունները։ Ինչպես նշել է Հաջիզադեն, Հանկե Բրյուինս Սլոթի նման հայտարարություններն անընդունելի են։

«Նման անպատասխանատու կարծիքներ առաջին անգամ չէ, որ հնչում են եվրոպական երկրների պաշտոնյաների կողմից։ Այդ հայտարարությունները Ադրբեջանի ներքին գործերին միջամտելու փորձեր են և տարածաշրջանում հետկոնֆլիկտային իրողությունների նկատմամբ կանխակալ մոտեցման օրինակ», - նշել է Հաջիզադեն։

Նրա խոսքով՝ «նման հայտարարությունները, ինչպես նաև Ադրբեջանի դեմ պատժամիջոցներ սահմանելու մասին սպառնալից հայտարարությունները հարված են երկկողմ հարաբերություններին և Ադրբեջանի և ԵՄ հարաբերություններին»:

«Ինչ վերաբերում է Նիդերլանդների արտաքին գործերի նախարարի՝ Ադրբեջան այցելելու մտադրությանը, ապա հայտնի է, որ այս այցը հետաձգվել է մեր նախաձեռնությամբ։ Ադրբեջանական կողմը նիդեռլանդական կողմին տեղեկացրել է, որ մտադիր է քննարկել ոչ թե Ադրբեջանի և Հայաստանի միջև հարաբերությունների կարգավորման գործընթացը կամ Ադրբեջանի ներքին հարցերը, այլ միայն երկկողմ հարաբերությունները: Կոչ ենք անում Նիդեռլանդական կողմին վերջ տալ նման հայտարարություններին», - ընդգծել է Հաջիզադեն։