Ուկրաինան և Մեծ Բրիտանիան միլիարդավոր դոլարների չափով համաձայնագիր են կնքել

Ուկրաինան և Մեծ Բրիտանիան համաձայնագիր են կնքել անվտանգության երաշխիքների մասին։ Մեծ Բրիտանիան հայտարարել Է Ուկրաինային պատերազմի սկզբից ի վեր պաշտպանական օգնության խոշորագույն փաթեթի մասին՝ 3 մլրդ դոլարի չափով։

Պայմանագիրը կգործի մինչև ՆԱՏՕ-ին Ուկրաինայի անդամակցությունը։

Համաձայնագիրը ստորագրել են Ուկրաինայի նախագահ Վլադիմիր Զելենսկին և Մեծ Բրիտանիայի վարչապետ Ռիշի Սունակը: Ուկրաինային անվտանգության ոլորտում երաշխիքներ տրամադրել պարտավորվել են «Մեծ յոթնյակի» բոլոր երկրները։ Մեծ Բրիտանիան առաջինն է:

Պայմանագիրը, որը բրիտանական իշխանություններն անվանում են «պատմական», նախատեսում է, որ Ուկրաինայի վրա նոր հարձակման դեպքում Մեծ Բրիտանիան «արագ և շարունակական» օգնություն կտրամադրի պաշտպանության ոլորտում:

Համաձայնագիրը նաեւ ձեւակերպում է այն օգնությունը, որը Լոնդոնն արդեն տրամադրում է Կիեւին, ներառյալ հետախուզական տվյալների փոխանակումը, համագործակցությունը կիբեռանվտանգության եւ պաշտպանական արդյունաբերության ոլորտներում, բուժաշխատողների եւ զինվորականների ուսուցումը:

Զելենսկու խոսքով՝ եթե Ուկրաինային նման երաշխիքներ տրվեին 1991 թվականին, ապա պատերազմը չէր սկսվի։