Բացառվում է սպանդանոցային վկայականի տրամադրում, որը հիմնված չէ փաստացի մորթի վրա․ ՍԱՏՄ ղեկավար
Այս պահին մեր տրամաբանության և վերահսկողության արդյունքում բացառվում է որևէ սպանդանոցային վկայականի տրամադրում, որը հիմնված չէ փաստացի մորթի վրա։ Այս մասին մամուլի ասուլիսի ընթացքում ասաց Սննդամթերքի անվտանգության տեսչական մարմնի պետ Արմեն Հայրապետյանը՝ պատասխանելով հարցին, թե ինչպես է պարտադրվում սպանդանոցային մորթը, երբ ոչ բոլոր մարզերում են այն առկա, իսկ որոշ սպանդանոցներ էլ ոչ հիգիենիկ պայմաններում են մորթ կատարում։
ՍԱՏՄ ղեկավարի խոսքով՝ մշտադիտարկումներ են իրականացվում, և թեժ գծի միջոցով ստացված ահազանգերի հետևանքով գնում են։
Ըստ նրա՝ 2023 թվականի դրությամբ առկա են եղել 101 սպանդանոցներ, 2022 թվականին այդ թիվը եղել է 99։
Դինամիկան, նրա կարծիքով, սակայն, դանդաղ է։
«271 սպանդանոցների նկատմամբ իրականացվել է վերահսկողություն, 34 տոկոսի մոտ խախտումներ են հայտնաբերվել»,- հավելեց Հայրապետյանը՝ տեղեկացնելով, որ սպանդանոցային մորթի իրականացման շրջանակում սկսել են կիրառել նաև գործիքակազմեր։
«Բոլոր մորթի գործընթացները տեսանկարահանվում են, սպանդանոցային մորթի փաստաթուղթը կարող է ձևավորվել, եթե մորթի գործընթացը տեսանկարահանված է։ Երկրորդ կարևոր գործիքակազմը դրոշմավորումն է, որի առկայությունը մսի վրա, թույլ է տալիս կատարել նույնականացում, արդյոք անասնաբուժական վկայականի նշված միսը և այդ վաճառքինը նույնական են, թե՝ ոչ»,- ընդգծեց ՍԱՏՄ ղեկավարը։
