Աթենքում ՌԴ դեսպանատուն անհայտ փոշով ծրար են ուղարկել
Աթենքում Ռուսաստանի դեսպանատուն անհայտ փոշիով ծրար են ուղարկել։ Այս մասին հաղորդում է ERT հունական հանրային հեռուստատեսությունը: Տեղեկությունը փոխանցում է ՌԻԱ Նովոստին։
«Անհայտ բաղադրության փոշիով կասկածելի ծրարը մտել է Ռուսաստանի դեսպանատուն»,- ասվում է հրապարակման մեջ:
Պսիխիկո շրջանում դիվանագիտական առաքելության շենքի մոտ են ժամանել ոստիկանությունն ու հրշեջ բրիգադը։ Այնտեղ է մեկնել նաև տարերային աղետների արձագանքման հատուկ ջոկատը։
Ռուսաստանի դեսպանատնից ավելի ուշ հայտնել են, որ աշխատակիցների կյանքին և անվտանգությանը վտանգ չի սպառնում:
«Հունվարի 12-ի առավոտյան Հունաստանի փոստի բաժանմունքից դեսպանատուն ծրար է ստացվել, որի վրա որպես ուղարկող երկիր նշված է Ֆինլանդիան»,- հստակեցրել են դիվանագիտական ներկայացուցչությունում:
Հունական հատուկ ծառայությունները նախնական ստուգում են անցկացրել եւ ծրարը տարել հետազոտության:
