Սա մեսիջ է բոլոր գերատեսչությունների ղեկավարներին․ Մինասյան

Հայաստանի հակակոռուպցիոն կոմիտեն ուսումնասիրում է մարզային հաստատություններում ՀՀ վարչապետ Նիկոլ Փաշինյանի արձանագրած անբարեխիղճ աշխատանքների փաստերը։ Այս մասին այսօր մամուլի ասուլիսի ժամանակ հայտարարեց արդարադատության նախարար Գրիգոր Մինասյանը։

«Ստուգվում է մրցույթների հայտարարման գործընթացը, կամ եթե աշխատանքը հանձնված է, ապա հանձնման-ընդունման ակտերը ստորագրված են, թե՝ ոչ։ Կա այդ ամենի մեջ անհամապատասխանություն, թե ոչ»,- ասաց նա։

Գրիգոր Մինասյանը վստահեցրեց, որ եթե ինչ-որ անհամապատասխանություն արձանագրվի, ապա կլինեն վարույթներ և աշխատանքի անբարեխիղճ կատարումը չի կարող անհետևանք մնալ։

«Հիմա բոլոր գործընթացները բաց ու թափանցիկ են ընթանում։ Սա մեսիջ է բոլոր գերատեսչությունների ղեկավարներին, թե ինչպես պետք է աշխատել և ինչ նոր նշաձող է սահմանվում երկրի ղեկավարի կողմից»,- նշեց նախարարը։

Մինասյանի խոսքով՝ երկու մարզպետ արդեն հեռացվել է աշխատանքից, որոշ պաշտոնյաների նկատմամբ էլ պատժամիջոցներ են կիրառվել:

Հիշեցնենք` ՀՀ վարչապետ Նիկոլ Փաշինյանը հունվարի 3-ին այցելել էր Լոռու մարզի մի շարք դպրոցներ` ծանոթանալու կառավարության կատարած աշխատանքներին։Նա մի շարք խախտումներ էր արձանագրել, ինչի արդյունքում Լոռու մարզպետ Արամ Խաչատրյանը և ՀՀ քաղաքաշինության կոմիտեի նախագահ Արմեն Ղուլարյանը պաշտոնանկ արվեցին։ Իսկ հունվարի 5–ին նա Արմավիրի մարզ էր այցելել, որից հետո պաշտոնանկ արվեց մարզպետ Էդվարդ Հովհաննիսյանը։