Պենտագոնի խոսնակը մեկնաբանել է ԱՄՆ պաշտպանության նախարարի հնարավոր հրաժարականի մասին լուրերը

ԱՄՆ պաշտպանության նախարար Լլոյդ Օսթինը, որը հայտնվել է սկանդալի կիզակետում իր հոսպիտալացման մասին ծանուցման ուշացման պատճառով, չի պատրաստվում լքել պաշտոնը։ Այս մասին գրում է ՌԻԱ Նովոստին՝ վկայակոչելով Պենտագոնի խոսնակ Պատրիկ Ռայդերին։

«Նախարար Օսթինը մտադիր չէ հեռանալ պաշտոնից։ Նա կենտրոնացած է՝ շարունակելու աշխատել և ծառայել ի բարօրություն մեր երկրի պաշտպանության», - ասել է Ռայդերը «Fox News» հեռուստաալիքի եթերում՝ մեկնաբանելով Օսթինի հնարավոր հրաժարականի շուրջ լուրերը։

Նախորդ շաբաթ ամերիկյան լրատվամիջոցները հայտնել էին, որ Պենտագոնը երեք օր գաղտնի է պահել Օսթինի հոսպիտալացման մասին տեղեկությունը Սպիտակ տնից։

ԱՄՆ պաշտպանության նախարարը հոսպիտալացվել է հունվարի 1-ին՝ պլանային բժշկական միջամտությունից հետո առաջացած բարդությունների պատճառով։ Ավելի վաղ Օսթինը վստահեցրել էր, որ իր առողջական վիճակը բարելավվում է՝ միաժամանակ խոստովանելով, որ կարող էր հանրությանը ավելի պատշաճ ձևով տեղեկացնել իր առողջական խնդիրների մասին։

Նշենք, որ Պենտագոնի ղեկավարը 70 տարեկան է։ Նա ԱՄՆ ռազմական գերատեսչությունը ղեկավարում է 2021 թվականի հունվարից։