Պահանջում ենք Երևանի քաղաքապետի երդման նոր արարողություն կազմակերպել. «Մայր Հայաստան»
Երևանի ավագանու «Մայր Հայաստան» խմբակցությունը դատական կարգով վիճարկում է Երևանի քաղաքապետ Տիգրան Ավինյանի կողմից լիազորությունների ստանձնման օրինականությունը։
«Այդ լիազորությունների ստանձնումը տեղի է ունեցել ավագանու քվորումի բացակայության պայմաններում։ Մենք պահանջում ենք երդման նոր արարողության կազմակերպում՝ օրենքի տառին և ոգուն համապատասխան։ Այլապես Ավինյանի և ընդհանրապես ամբողջ քաղաքապետարանի գործունեությունը կարող է հայտնվել օրենքից դուրս՝ այդտեղից բխող բոլոր հետևանքներով»,– ֆեյսբուքյան իր էջում գրել է Երևանի ավագանու «Մայր Հայաստան» խմբակցության անդամ Սամվել Հակոբյանը։
Նա նշել է, որ 2023 թվականին նույն թեմայով իր կողմից ներկայացրած հայցադիմումը ՀՀ վարչական դատարանը չէր ընդունել վարույթ՝ ձևական պատճառաբանությամբ։ Դատարանի այդ որոշումը բողոքարկվել է ՀՀ վերաքննիչ դատարանում։ Դատարանը որոշել է, որ քաղաքապետի լիազորությունների ստանձնման վիճարկմանը վերաբերող հայցադիմումը պետք է ընդունել վարույթ։
«Դատարանը որոշել է, որ մենք ճիշտ ենք, իսկ Վարչական դատարանը՝ սխալ։ Այնպես որ, Տիգրան Ավինյանի լիազորությունների ապօրինի ստանձնման թեման դեռ փակված չէ։ Մենք իրավաքաղաքական բոլոր գործիքակազմերն օգտագործելու ենք ապօրինությունների դեմն առնելու համար»,–գրել է ավագանու անդամը։
Նրա խոսքով` եթե դատարանը Տիգրան Ավինյանին պարտադրի լիազորությունների ստանձնման նոր նիստ գումարել, մինչև այդ պահը նրա ստորագրած բոլոր որոշումներն ու հրամանները, այդ թվում՝ ավագանու որոշումների կյանքի կոչումը, պետք է ուժը կորցրած ճանաչվեն։
