Իրանում մահապատժի են ենթարկել Իսրայելի հետ կապված դիվերսիոն խմբի չորս անդամների

Իրանի իշխանություններն ի կատար են ածել Իսրայելի հետ կապված դիվերսիոն խմբի տասը անդամներից չորսի նկատմամբ մահապատժի դատավճիռը: Այս մասին հայտնում է ISNA գործակալությունը։ Տեղեկությունը փոխանցում է ՏԱՍՍ-ը։ 

«Սիոնիստական ռեժիմի հետ կապված դիվերսիոն խմբի չորս անդամներ, որոնք իրենց գործողություններով փորձել են խաթարել երկրի անվտանգությունը իսրայելական «Մոսադ» հետախուզական ծառայության սպաների ղեկավարությամբ, կախաղան են բարձրացվել այսօր առավոտյան»,- մեջբերում Է գործակալությունը դատարանի հայտարարությունը:

Հոկտեմբերի 24-ին հայտարարվել էր, որ Իրանի հետախուզական ծառայության աշխատակիցները ձերբակալել են 10 հոգուց բաղկացած խմբի: Թեհրանի վարկածով՝ նրանց գլխավոր խնդիրն է եղել բացահայտել Իրանի հատուկ ծառայությունների և ԶՈՒ այն աշխատակիցներին, որոնք աշխատում են իսրայելական ուղղությամբ: Նշվում է, որ նրանք տեսակապի միջոցով ուղիղ կապ են ունեցել «Մոսադի» սպաների հետ։