Հյուսիսային Կորեայի առաջնորդ Կիմ Չեն Ընը կոչ է արել պատրաստվել հնարավոր պատերազմի
Հյուսիսային Կորեայի բանակը և ռազմարդյունաբերությունը պետք է ակտիվացնեն հնարավոր պատերազմին նախապատրաստվելու ջանքերը։ Այս մասին հայտարարել Է Հյուսիսային Կորեայի առաջնորդ Կիմ Չեն Ընը:
«Մարտական խնդիրներ են դրվել ժողովրդական բանակի, ռազմարդյունաբերության, միջուկային զենքի եւ քաղաքացիական պաշտպանության ոլորտների առջեւ՝ պատերազմի նախապատրաստության կատարելագործման հետագա արագացման համար»,- հայտնել Է Կորեայի կենտրոնական հեռագրական գործակալությունը:
Հյուսիսային Կորեան նոյեմբերի 21-ին արձակել է «Մանրիգեն-1» հետախուզական արբանյակը: Կորեայի կենտրոնական հեռագրական գործակալության հաղորդագրության մեջ այն ժամանակ ընդգծվում էր, որ դա կբարձրացնի երկրի պատրաստվածությունը ռազմական գործողությունների, որոնց հավանականությունը մեծանում է «թշնամիների շատ վտանգավոր ռազմական գործողությունների պատճառով»: Ավելի ուշ Հյուսիսային Կորեայում հայտարարել են, որ երկրի արբանյակների աշխատանքին միջամտելը կդիտարկեն որպես պատերազմի հայտարարում։
Արձակումից մոտ մեկ օր առաջ ամերիկյան USS Carl Vinson ավիակիրը ժամանել է Հարավկորեական Բուսանի ռազմածովային բազա։ Հարավային Կորեայի ռազմածովային ուժերը հայտնել են, որ դա ցույց է տալիս երկու երկրների «լիակատար վճռականությունը՝ արձագանքելու Հյուսիսային Կորեայի կողմից աճող միջուկային և հրթիռային սպառնալիքներին»:
Արբանյակի արձակումից հետո Սպիտակ տունը հայտարարել է, որ «խստորեն դատապարտում է» այդ քայլը որպես ՄԱԿ-ի Անվտանգության խորհրդի բանաձեւերի խախտում, քանի որ դրա ժամանակ օգտագործվել են բալիստիկ հրթիռների տեխնոլոգիաներ, ինչն արգելված է փաստաթղթով:
