Մենք մեր հայ գործընկերների հետ ապաքաղաքականացված երկխոսություն ենք կառուցում․ Զախարովա

Մոսկվան աջակցում է 2024 թվականին ԵԱՏՄ-ում Հայաստանի նախագահության շրջանակներում արդյունավետ աշխատանքի Երևանի տրամադրվածությանը։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան: Տեղեկությունը փոխանցում է ՌԻԱ Նովոստին։

«Մենք մեր հայ գործընկերների, ինչպես նաև ԵԱՏՄ անդամ մյուս պետությունների հետ կառուցողական, ապաքաղաքականացված երկխոսություն ենք կառուցում։ Հունվարի մեկից Միության մարմիններում նախագահությունը, ինչպես դուք կրկին նշեցիք, անցնում է Հայաստանին։ Այս երկրի վարչապետը, դեկտեմբերի 25-ին ելույթ ունենալով Սանկտ Պետերբուրգում կայացած Եվրասիական տնտեսական բարձրագույն խորհրդի նիստում, հայտարարեց, որ Երևանը կենտրոնացած է միջնաժամկետ և երկարաժամկետ հեռանկարում ԵԱՏՄ շրջանակներում առաջադրանքների համակարգված իրականացման վրա: Մենք աջակցում ենք մեր գործընկերների տրամադրվածությանը, ահա հենց այդպիսի տրամադրվածություն հետագա արդյունավետ աշխատանքի նկատմամբ, որն ուղղված է Եվրասիական տնտեսական ինտեգրման ամրապնդմանն ու զարգացմանը»,- ասել է նա ճեպազրույցի ժամանակ՝ պատասխանելով համապատասխան հարցին։