Ինչ եղանակ սպասել մինչև շաբաթվա վերջ
Հայաստանի Հանրապետության տարածքում դեկտեմբերի 24-ի ցերեկը, 25-ի գիշերը շրջանների մեծ մասում սպասվում են տեղումներ, լեռնային շրջաններում՝ ձյուն և բուք, ճանապարհներին` նաև մերկասառույց։ Այս մասին հայտնում է ՀՀ ՇՄՆ Հիդրոօդերևութաբանության և մոնիտորինգի ազգային կենտրոնը։
Դեկտեմբերի 25-ի ցերեկը սպասվում է առանց տեղումների եղանակ։ Քամին՝ արևմտյան 4-7 մ/վ, առանձին վայրերում սպասվում է քամու ուժգնացում` 28-33 մ/վրկ արագությամբ։
Օդի ջերմաստիճանը դեկտեմբերի 25-26-ի ցերեկը կբարձրանա 4-6 աստիճանով։
«Այսօր ցերեկն ու առաջիկա գիշերը Շիրակում, Լոռիում, Տավուշի նախալեռներում, Արագածոտնում, Կոտայքում, Գեղարքունիքում, Վայոց Ձորում, Սյունիքի նախալեռներում սպասվում է ձյուն, տեղ-տեղ՝ ինտենսիվ, առանձին հատվածներում` քամու ուժգնացում 28-33 մ/վրկ, բուք, ճանապարհներին մերկասառույց»,–ասվում է հաղորդագրության մեջ։
Երևանում այսօր ցերեկն ու առաջիկա գիշերը սպասվում են տեղումներ, քաղաքի բարձրադիր գոտում՝ թաց ձյուն, ցածրադիր գոտում՝ ձնախառն անձրև։
Այսօր սպասվում է նաև քամու ուժգնացում 17-20 մ/վրկ արագությամբ։
Երևանում սպասվող տեղումները բարձրադիր գոտում կլինեն թաց ձյան, ցածրադիր գոտում՝ ձնախառն անձրևի տեսքով։
