ԼՈՒՍԱՆԿԱՐՆԵՐ․ Վթար՝ Շիրակի մարզում․ բախվել են մեքենաներ՝ վրաերթի ենթարկելով քաղաքացուն. կան տուժածներ
Դեկտեմբերի 9-ին, ժամը 07:24-ին Շիրակի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Արթիկ-Ալագյազ ավտոճանապարհին տեղի է ունեցել ՃՏՊ, կա արգելափակված քաղաքացի. անհրաժեշտ է փրկարարների օգնությունը: Այս մասին հայտնում են ՆԳՆ փրկարար ծառայությունից:
Դեպքի վայր է մեկնել փրկարար ծառայության մարզային փրկարարական վարչության հրշեջ-փրկարարական ջոկատից մեկ մարտական հաշվարկ:
Պարզվել է, որ «Opel» մակնիշի ավտոմեքենան (վարորդ՝ Բ․ Մ․ ծնված 1991 թ.) բախվել է կայանած «GAZelle» մակնիշի բեռնատարին (վարորդ՝ Հ․ Մ․, ծնված 1962 թ.), որն էլ վրաերթի է ենթարկել Ն․ Մ․-ին (ծնված 1987 թ.)։ «Opel» մակնիշի ավտոմեքենայի ուղևորը արգելափակվել է։
Ն․Մ․-ն և Հ. Մ․-ն հոսպիտալացվել են բժշկական կենտրոն, որտեղ բժիշկները նրանց առողջական վիճակը գնահատել են բավարար:
Փրկարարները հոսանքազրկել են ավտոմեքենաները, փակել գազի բալոնների փականները, «Opel» մակնիշի ավտոմեքենայի ուղևոր Մ․ Մ․-ին (ծնված 1963 թ.) դուրս բերել արգելափակումից և մոտեցրել շտապօգնության ավտոմեքենային։ Նա հոսպիտալացվել է բժշկական կենտրոն, որտեղ նրա առողջական վիճակը գնահատվել է ծանր։
