ՏԵՍԱՆՅՈՒԹ. Հրազդանում ականատես ենք եղել շների սպանդի. հասարակությունը 2 մասի է բաժանվել. Արեգնազ Մանուկյան
Օրերս, ըստ պաշտոնական տեղեկատվության, թափառող շներից վախենալու հետեւանքով դպրոցական երեխաները դպրոց գնալու ճանապարհին վազել էին, նրանցից մեկը ընկել էր, գլուխը հարվածել էր սալիկներին եւ մահացել: Այս մասին, այսօր՝ դեկտեմբերի 8-ին, ԱԺ-ում հայտարարեց «Հայաստան» խմբակցության պատգամավոր Արեգնազ Մանուկյանը՝ հավելելով, դրան հաջորդեց թափառող շների նկատմամբ ատելության արշավ:
«Փաստացի, երեկ Հրազդանում ականատես ենք եղել շների սպանդի: Առանձնակի դաժանությամբ վերացրել են թափառող շներին, նրանց վրա մի քանի անգամ կրակել են: Սա էլ բորբոքել ու ցասում է առաջացրել կենդանասերների շրջանում: Այս երկու դեպքերը հասարակությանը բաժանել են երկու մասի. Մարդիկ, որոնք ասում են՝ միանշանակպետք է վերացնել թափառող կենդանիներին, եւ կենդանասերներ, որոնք ասում են՝ մարդիկ իրենց վերաբերմունքով են հասցնում նրան, որ կենդանիները իրենց վրա հարձակվեն:
Սա միանշանակ կառավարության եւ իրավապահ մարմինների թերի աշխատանքի հետեւնքն է: Կառավարությունը պետք է ապահովի ստերջացման համակարգը, որը թերի է կատարվում»,-ասաց նա:
Նշենք, որ կենդանասերներն այսօր՝ դատախազության դիմաց բողոքի ակցիա են իրականացրել՝ իրենց հետ բերելով սպանված շներից մեկի մարմինը:
