Հայտնի է, թե ինչքան ժամանակով կարգելվի Սևանա լճում սիգի որսը

Սևանա լճում սիգի որսն արգելվում է մինչև 2024–ի հունվարի 20-ը ներառյալ։ Այս մասին հայտնում է շրջակա միջավայրի նախարարության մամուլի ծառայությունը։ Սիգի ձվադրման ժամանակահատվածով պայմանավորված՝ հսկողության ուժեղացված միջոցառումներ կիրականացվեն Սևանա լճում և Հայաստանի ամբողջ տարածքում։

«Սևան» ազգային պարկի տարածքից դուրս են բերվելու լողամիջոցներ, որսագործիքներ և ձկնորսների ժամանակավոր կացարաններ, արգելվելու է բոլոր տեսակի որսագործիքների և լողամիջոցների մուտքը Սևանա լիճ։

«Սևանա լիճը գոտևորող բոլոր անտառային ճանապարհների վրա խիստ վերահսկողություն սահմանվում, մարզից դուրս եկող հիմնական ճանապարհների ելքերի մոտ կտեղակայվեն հսկիչ կետեր»,- նշված է հաղորդագրության մեջ։ «Սևան» ազգային պարկի տարածքում նաև շուրջօրյա հերթապահություն կսահմանվի։ Երևանի և ՀՀ մարզերի շուկաներում սիգի ձկնկիթի և ձկան վաճառքը բացառելու համար կկազմակերպվեն ստուգայցեր։

Պատասխանատու գերատեսչությունների ներկայացուցիչները նաև հանդիպումներ են անցկացնելու Սևանա լճի հարակից բնակավայրերի ղեկավարների, ձկնորսների և քաղաքացիների հետ։ Գերատեսչությունից ընդգծում են՝ ձկնորսությամբ զբաղվող մեր հայրենակիցները պետք է գիտակցեն, որ նման միջոցառումներն ունեն մեկ նպատակ՝ ձկնապաշարների վերականգնման միջոցով վերականգնել Սևանա լճի էկոհամակարգը, որը բխում է ՀՀ յուրաքանչյուր քաղաքացու շահերից։

Կոչ են անում ՀՀ քաղաքացիներին սրտացավությամբ մոտենալ համազգային կարևորության այս խնդրին և աջակցել որսի արգելքի միջոցառումների իրականացմանը: