«Կուտակային համակարգում վճարում կատարած արցախցուն չեն ասել՝ դու ՀՀ անձնագիր չես ունեցել, քաղաքացի չես». պատգամավոր
ԱԺ քառօրյայի մեկնարկին «Հայաստան» խմբակցության պատգամավոր Գեղամ Մանուկյանն անդրադարձավ ՀՀ քաղաքացու անձնագրի խնդրին ու պատկան մարմինների արձագանքներին: «Պաշտպանության հանձնաժողովում Միգրացիոն ծառայության պետ Արմեն Ղազարյանին մի հստակ հարց էի տվել՝ ի վերջո կարո՞ղ է պարզ բացատրել, թե բոլորը ե՞րբ կարող են ստանալ ID քարտերն ու կենսաչափական անձնագրերը, պատասխանը՝ հայտնի չի: Փոխարենը առավոտից գիշեր հեռուստաեթերից չի իջնում ու փորձում է հանրությանը համոզել, որ Արցախի քաղաքացիներին տրված կապույտ անձնագիրը լոկ ճամփորդական է ու չեն կարող տարբեր պաշտոնների նշանակվել: ՀՀ ԱԽ քարտուղարը, որը ծնունդով Մարտունիից է, վստահաբար այդպիսի անձնագիր է ունեցել, ԳՇ պետ Էդվարդ Ասրյանը, որ Հադրութից է, վստահ՝ այդպիսի անձնագիր է ունեցել: 30 տարի շարունակ ԱՀ առաջնագծում արցախցիները որ պաշտպանել են մեր երկրի անվտանգությունը, Ջերմուկի ու Վարդենիսի անվտանգությունը, չեն ասել՝ դու ճամփորդական անձնագիր ես ունեցել: Պարտադիր կուտակային համակարգում վճարում կատարած արցախցուն չեն ասել՝ դու ՀՀ անձնագիր չես ունեցել, քաղաքացի չես ու վաղն էլ կենսաթոշակ չես ստանալուն»,- նշեց պատգամավորը: Նիստին Գեղամ Մանուկյանը նաև ասաց, որ բյուջեի նախագծով առաջին անգամ գումար պետք է հատկացվի արտաքին հետախուզական ծառայությանը, սակայն պատգամավորները որևէ կերպ հնարավորություն չեն ունեցել ստանալ այդ բյուջեի նախագծի բացվածքը, քանի որ արտաքին հետախուզական ծառայության ներկայացուցիչ Ազգային ժողով չի եկել, առնվազն պաշտպանության հանձնաժողով չի ներկայացել։ ԱԺ նախագահ Ալեն Սիմոնյանն առաջարկեց ընդմիջման ժամանակ քննարկել, թե ինչպես կարող են լուծել, գտնել ոսկե միջինը։ |
