«Տեսանք, որ նա հյուրընկալել է Պետդեպի ներկայացուցչին»․ ՌԴ-ն՝ Գրիգորյանի ԱԽ քարտուղարների նիստին չգալու մասին
Հայաստանը մասնակցել է ԱՊՀ Անվտանգության խորհուրդների քարտուղարների հանդիպմանը՝ չնայած Արմեն Գրիգորյանի բացակայությանը։
Ճեպազրույցի ժամանակ ՌԴ ԱԳՆ պաշտոնական ներկայացուցիչ Մարիա Զախարովան ասել է, որ Հայաստանի անվտանգության խորհրդի քարտուղար Արմեն Գրիգորյանն ի սկզբանե պատրաստվում էր մասնակցել ԱՊՀ ԱԽ քարտուղարների նիստին, սակայն հետո հրաժարվել է ժամանակացույցի փոփոխության պատճառով:
«Հետո մենք տեսանք, որ նա Երևանում հյուրընկալել էր Պետդեպարտամենտի Հարավային Կովկասի հարցերով ավագ խորհրդականին։ Միաժամանակ ԱԽ քարտուղարների նիստում Հայաստանը ներկայացել էր Ռուսաստանում ՀՀ դեսպանով և ընդհանուր առմամբ մասնակցում էր նիստին», - նշել է ՌԴ ԱԳՆ պաշտոնական ներկայացուցիչը:
Նա ընդգծել է՝ մասնակցության մակարդակը որոշում է հենց պետությունը։
Հիշեցնենք` նոյեմբերի 8-ին Մոսկվայում կայացել է ԱՊՀ մասնակից պետությունների անվտանգության խորհուրդների քարտուղարների հերթական հանդիպումը, որի նախորդ օրը հայտնի դարձավ, որ Արմեն Գրիգորյանը չի մասնակցելու նիստին։
