Արցախի որոշ դեմքեր ծանր հոդվածներով պետք է դատվեն. Տիգրան Աբրահամյան
Ադրբեջանը նոր պահանջներ է ներկայացնում ութ գյուղերի հանձնման համար: Այս մասին 24TV-ի հաղորդման ժամանակ ասել է ԱԺ «Պատիվ ունեմ» խմբակցության քարտուղար Տիգրան Աբրահամյանը։
Իր խոսքով՝ Ադրբեջանը նպատակ ունի այս իշխանության օրոք հասնել առավելագույնի։
«Այդ տարածքները իրավական հիմքեր չունեն, բայց Փաշինյանը հռչակել է ադրբեջանական տարածքներ՝ դարձնելով այն վիճելի հարց։ Ժամանակին ասում էին՝ պետք է Արցախը հանձնենք, որ հանգիստ ապրենք, հիմա էլ պատրաստ են Հայաստանից նոր տարածքներ զիջել, որը իբրև թե բերելու է խաղաղություն»,– ասել է նա։
Աբրահամյանը նաև մեկնաբանել է Էդմոն Մարուքյանի այն տեսակետը, ըստ որի՝ ՀՀ-ում չպետք է Արցախի պետական ինստիտուտները գործեն, քանի որ այն անվտանգային համատեքստում սխալ է: Իր խոսքով՝ իշխանությունը փակում է Արցախի հարցը՝ ոչնչացնելով վերջին բեկորները և այն դիտարկելով սպառնալիք. «Արցախի բարձր քաղաքական էլիտան, բացառությամբ մի քանի պատգամավորների, դեռևս քաղաքական գնահատական չի հնչեցրել, թե ով է ստեղծված իրավիճակի մեղավորը։ Չի ձևակերպվել նաև, թե ինչ ճանապարհով է Արցախն առաջ շարժվելու»։
Պատգամավորը նշել է, որ Արցախում տեղի են ունեցել իրադարձություններ, որոնք պետք է քննության առարկա դառնան․ «Արցախի որոշ դեմքեր ծանր հոդվածներով պետք է դատվեն, մի շարք հարցեր կան՝ վերջին շրջանի ֆինանսական չարաշահումներ, վառելիքաքսուկային պայթյունի հանգամանքներ, որի պատճառով 200-ից ավելի մարդ է մահացել։ Նույնը վերաբերում է Ադրբեջանի հետ բանակցություններին․ Սամվել Բաբայանը հայտարարում է, որ բանակցել է Բաքվի հետ, բայց որևէ մեկը տեղյակ չէ, թե ով է նրան տվել լիազորություն և ինչ փաստաթուղթ է դա»։
