Անթույլատրելի է Ադրբեջանի հետ սպառնալիքների լեզվով խոսելը. Ադրբեջանի ԱԳՆ–ն՝ ԱՄՆ Պետդեպին
Չնայած նրան, որ ԱՄՆ-ն տասնամյակներ շարունակ միջնորդ է եղել, վճռականորեն չի խրախուսել Ադրբեջանի ինքնիշխանությունը և տարածքային ամբողջականությունը, փոխարենը ֆինանսական աջակցություն է ցուցաբերել Լեռնային Ղարաբաղին: Այս մասին հայտնել է Ադրբեջանի ԱԳՆ մամուլի քարտուղար Այհան Հաջիզադեն՝ այսպիսով պատասխանելով ԱՄՆ պետդեպի պաշտոնյաների՝ իր խոսքով «հակաադրբեջանական» հայտարարություններին:
«Ադրբեջանի հետ սպառնալիքների լեզվով խոսելն անթույլատրելի է։ Ադրբեջանի դեմ ցանկացած ոչ բարեկամական գործողություն դրական արդյունք չի տա, և նման գործողություններին համարժեք պատասխան կլինի»,- նշվում է ադրբեջանական կողմի հայտարարությունում:
Ադրբեջանի ԱԳՆ–ն Հայաստանն անվանել է «ագրեսիվ պետություն», ՀՀ վարած քաղաքականությունը «օկուպացիոն», իսկ Միացյալ Նահանգներին մեղադրել է «անցյալ հակամարտության խաղաղ կարգավորման ուղղությամբ անգործության»:
«Եթե ԱՄՆ-ն այլ մոտեցում ցուցաբերեր Ադրբեջանի դեմ սպառնալիքներին, ինչպես նաև միջազգային խաղաղությանն ու անվտանգությանը, ապա Ադրբեջանի դեմ սպառնալիքները ուժով լուծելու անհրաժեշտություն չէր լինի, և հարցը կլուծվեր խաղաղ ճանապարհով»,– գրված է հաղորդագրության մեջ։
Նշենք, որ խոսքը այն հայտարարությունների մասին է, որոնք վերաբերում են ԱՄՆ–ի կողմից ՀՀ–ի ինքնիշխանությանն ու տարածքային ամբողջականությանը աջակցելուն, ինչպես նաև Արցախի դեմ Ադրբեջանի ագրեսիայից հետո Հայաստանում առաջացած ծանր հումանիտար կարիքների լուծման համար լրացուցիչ ֆինանսավորման անհրաժեշտությանը:
