Առկա է Արցախում մնացած հուշարձանների տվյալների բազան․ Ֆրանսիայի մշակույթի նախարար
Ֆրանսիան ֆինանսավորել է պատմամշակութային պահպանության հարցերով զբաղվող ALIPH ասոցիացիային, որպեսզի տվյալներ հավաքագրի Լեռնային Ղարաբաղում մնացած պատմամշակութային ժառանգության ներկայիս վիճակի մասին։ Մատենադարանում ՀՀ ԿԳՄՍ նախարար Ժաննա Անդրեասյանի հետ համատեղ ասուլիսում այս մասին ասաց Ֆրանսիայի մշակույթի նախարար Ռիմա Աբդուլ Մալակը։
«Ֆրանսիայի հատկացրած ֆինանսավորման միջոցով ALIPH ընկերությունը կարողացել է արբանյակային պատկերների միջոցով նույնականացնել Արցախում մնացած հուշարձանները։ Արդեն առկա է այդ տվալների բազան։ Մեր ձեռքի տակ են Արցախում մնացած հուշարձանների ներկայիս վիճակը պատկերող նկարները, այսինքն` պատմամշակութային նմուշների աղավաղված վիճակը»,- ասաց Ֆրանսիայի մշակույթի նախարարը։
Նախարարի խոսքով՝ Ֆրանսիան համագործակցում է ՅՈւՆԵՍԿՕ-ի և եվրոպական երկրների հետ այդ խնդրին լուծում տալու համար և արդեն հայց է ներկայացրել ՅՈւՆԵՍԿՕ-ին, որպեսզի կազմակերպությունը կարողանա թույլտվություն ստանալ և նրա անդամները ֆիզիկապես կարողանան այցելել այդ տարածքներ և նույնականացնել այն բոլոր պատմամշակութային նմուշները, որոնք հայկական են։
