ՏԵՍԱՆՅՈՒԹ. Նախկին «ստատուս քվոյին» վերադարձի հնարավորություն չեմ տեսնում. Բայդենը` Գազայի հատվածում իրավիճակի մասին

ԱՄՆ նախագահ Ջո Բայդենը հայտարարել է, որ պաղեստինա-իսրայելական հակամարտության գոտում իրավիճակը մինչ սրացումը գոյություն ունեցած «ստատուս քվոյին» վերադարձնելու որևէ հնարավորություն չի տեսնում։

Նրա խոսքով, դա նշանակում է, որ ՀԱՄԱՍ-ին չպետք է թողնել Իսրայելին «ահաբեկելու» հնարավորությունը, և մերձավորարևելյան երկու կողմերի համար պետք է ուրվագծել խաղաղության ճանապարհ, որը, նախագահի տեսանկյունից, ենթադրում է «երկու պետություն երկու ժողովուրդների համար» բանաձեւը։

«Չկա վերադարձ այն ստատուս-քվոյին, որը գոյություն ուներ հոկտեմբերի 6-ին: Սա նշանակում է երաշխավորել, որ ՀԱՄԱՍ-ն այլևս չունի Իսրայելին ահաբեկելու և պաղեստինցի խաղաղ բնակիչներին որպես կենդանի վահան օգտագործելու կարողություն»,- ասել է Բայդենը այսօր կայացած մամուլի ասուլիսում: 

Սոցցանցերում և ԶԼՄ- ներում տարածվում է նաև Բայդենի մամուլի ասուլիսից հատված, որում ամերիկացի առաջնորդը լեզվական հերթական սայթաքումն է անում։ Այս անգամ ԱՄՆ նախագահը Գազայի բնակիչներին հումանիտար օգնություն հասցնելու համար Եգիպտոսի ղեկավարի փոխարեն  շնորհակալություն է  հայտում պաղեստինցիներին։