Փաշինյանը խոսել է թուրք հարևանների հետ ՀՀ կապերի մասին

ՀՀ վարչապետ Նիկոլ Փաշինյանը հայտարարել է, որ ինչպես և նախկինում, լավատեսորեն է տրամադրված առաջիկա ամիսներին Ադրբեջանի հետ խաղաղ կարգավորման հեռանկարների հանդեպ: Այս մասին նա ասել է Wall Street Journal–ին տված հարցազրույցում։ Ըստ ՀՀ վարչապետի` տարածաշրջանի ապագան փակ սահմանների և առևտրային ուղիների բացումն է, ներառյալ Հայաստանի միջոցով Ադրբեջանի և Թուրքիայի միջև ցամաքային հաղորդակցությունը` Հայաստանի ինքնիշխանության հարգմամբ։
 

«Անվտանգությունը պետք է ձեռք բերել ոչ միայն բանակի, այլև տարածաշրջանային խաղաղության միջոցով»,– ասել է նա:

Պատասխանելով Հայաստանի` Ռուսաստանի հետ ունեցած պատմական հարաբերությունների մասին հարցին՝ Փաշինյանը կոչ է արել դրա փոխարեն կենտրոնանալ Հայաստանի հարաբերությունների շատ ավելի երկար պատմության վրա թուրք հարևանների` Թուրքիայի և Ադրբեջանի հետ։

«Ահա թե որտեղ են թաքնված բոլոր հարցերը, և ահա թե որտեղ են թաքնված բոլոր հարցերի պատասխանները»,– ասել է նա:

Նա շեշտել է, որ Հայաստանը նախևառաջ պետք է աշխատի տարածաշրջանային հարաբերությունների բարելավման ուղղությամբ: