Էրդողանի հրահրիչ խոսքերը չեն փոխի այն սարսափները, որոնք տեսել է ամբողջ աշխարհը․ Իսրայելի ԱԳՆ ներկայացուցիչ
Իսրայելի ԱԳՆ ներկայացուցիչ Լիոր Հայաթը անդրադարձել է ՀԱՄԱՍ-ի մասին Թուրքիայի նախագահ Թայիփ Էրդողանի հայտարարությանը և նշել, որ այն չի փոխի ՀԱՄԱՍ շարժման առաջացրած «սարսափները»: Փոխանցում է ՌԻԱ Նովոստին։
«Իսրայելը վրդովված մերժում է ՀԱՄԱՍ-ի ահաբեկիչների մասին Թուրքիայի նախագահի օդիոզ հայտարարությունները։ Նույնիսկ Թուրքիայի նախագահի այս փորձը՝ պաշտպանելու ահաբեկչական կազմակերպությունը և նրա հրահրիչ խոսքերը, չեն փոխի այն սարսափները, որոնք տեսել է ամբողջ աշխարհը»,- ասվում է Հայաթի հայտարարության մեջ։
Հիշեցնենք, որ ավելի վաղ Ռեջեփ Թայիփ Էրդողանը Թուրքիայի խորհրդարանում հայտարարել է, որ Անկարան պաղեստինյան ՀԱՄԱՍ արմատական շարժումը համարում է ոչ թե ահաբեկչական կազմակերպություն, այլ «ազատագրական խմբավորում» և Իսրայելի վրա հարձակված շարժումը պայքարում է Պաղեստինի ժողովրդի ազատագրման համար:
