Իսրայելական բանակը հայտարարել է, որ պատերազմի հաջորդ փուլը կարող է տարբերվել սպասելիքներից

Իսրայելական բանակը պատրաստվում է Գազայի հատվածի դեմ արշավի հաջորդ փուլին, սակայն ծրագրերը կարող են չհամընկնել մոտալուտ ցամաքային հարձակման լայն տարածված ակնկալիքների հետ, երեքշաբթի ասել է Իսրայելի պաշտպանության բանակի (ՑԱԽԱԼ) խոսնակ, փոխգնդապետ Ռիչարդ Հեխտը, հաղորդում է Reuters-ը։ 

«Մենք պատրաստվում ենք պատերազմի հաջորդ փուլերին։ Մենք դեռ չենք ասել, թե որոնք են դրանք լինելու։ Բոլորը խոսում են ցամաքային հարձակման մասին։ Դա կարող է այլ բան լինել»,- ճեպազրույցում ասել է Հեխտը:

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին: