Սաուդյան Արաբիան դադարեցնում է Իսրայելի հետ հարաբերությունների կարգավորումը

Սաուդյան Արաբիայի իշխանությունները Միացյալ Նահանգների նախագահ Ջո Բայդենի վարչակազմին փոխանցել են Իսրայելի հետ հարաբերությունների կարգավորումը դադարեցնելու որոշման մասին։ Այս մասին, հղում անելով դիվանագիտական աղբյուրներին, հաղորդել է Bloomberg լրատվական գործակալությունը:

Երեկ Սաուդյան Արաբիա է ժամանել ԱՄՆ-ի պետական քարտուղար Էնթոնի Բլինկենն, ով նախագահ Բայդենի կարգադրությամբ Մերձավոր Արևելք է մեկնել իսրայելա-պաղեստինյան արյունալի հակամարտության կապակցությամբ:

Դիվանագիտական աղբյուրի փոխանցմամբ, Ալ-Ռիադը դադարեցրել է հարաբերությունները կարգավորելու դիվանագիտական աշխատանքն այն բանից հետո, երբ անցած շաբաթ օրը մեկնարկած հակամարտության ընթացքում Իսրայելը ծանր հարվածներ է հասցրել Գազայի հատվածին և շրջափակել է այդ տարածքը:

Ըստ լրատվականի, Սաուդյան Արաբիայի որոշումը «լուրջ հարված է նախագահ Ջո Բայդենի հավակնություններին և Մերձավոր Արևելքում նրա քաղաքականությանը, քանի որ Վաշինգտոնը մտադիր էր նպաստել տարածաշրջանում հարաբերությունների բարելավմանը»:

Ավելի վաղ Reuters-ը, վկայակոչելով իր աղբյուրները, հայտնել է, որ Սաուդյան Արաբիան դադարեցրել է հրեական պետության հետ հարաբերությունների կարգավորումը։ Համապատասխան բանակցությունները հետաձգվում են։

Լրատվականի մեկ այլ զրուցակից ասել է, որ Վաշինգտոնն օրերս կոչ է արել Ալ-Ռիադին դատապարտել «Համաս» շարժման գործողությունները, սակայն թագավորության արտաքին գործերի նախարար Ֆեյսալ բեն Ֆարհան Ալ Սաուդը մերժել է կոչը: