Ֆրանսիայի հյուսիսում գտնվող լիցեյում տղամարդը դանակով հարձակվել է դպրոցականների վրա և սպանել ուսուցչուհուն, հայտնում է BFMTV-ն, տեղեկությունը փոխանցում է ՌԻԱ Նովոստի-ն:

Միջադեպը տեղի է ունեցել առավոտյան ժամը 11-ի սահմաններում Արրաս քաղաքի Գամբետա լիցեյում՝ Պա-դե-Կալե դեպարտամենտում: Հեռուստաալիքի տվյալներով՝ ուսուցիչը տեղում մահացել է դանակի հարվածներից։ Եվս մի քանի մարդ վիրավորվել է։

Ոստիկանության աղբյուրի համաձայն՝ հարձակման ժամանակ մարդասպանը բղավել է «Ալլահ աքբար»:

Ավելի ուշ Ֆրանսիայի ներքին գործերի նախարար Ժերալդ Դամանենը հայտնել է, որ հարձակվողը ձերբակալվել է։ Պարզվել է, որ նա Չեչնիայից է, 20 տարեկան: BFMTV-ի փոխանցմամբ՝ երիտասարդը պետական ​​անվտանգությանը սպառնացող անձանց ցուցակում է։ Նրա եղբորը բերման են ենթարկել մեկ այլ դպրոցում, վերջինիս մոտ զենք չի հայտնաբերվել։

Նշվում է, որ սպանված ուսուցիչը գրականություն էր դասավանդում: Վիրավորների թվում են ևս մեկ ուսուցիչ, որը վերակենդանացման բաժանմունքում է և անվտանգության աշխատակիցը, որի վիճակը գնահատվում է ծանր: Աշակերտներից ոչ ոք չի տուժել։