Բոբ Մենենդեսը և իր կինը գրավի դիմաց ազատ են արձակվել. սենատորն իրեն մեղավոր չի ճանաչել

ԱՄՆ սենատոր Ռոբերտ Մենենդեսը, ով մեղադրվում է կոռուպցիայի մեջ, դատարանի դահլիճում գրավի դիմաց ազատ է արձակվել կնոջ և երկու այլ մեղադրյալների հետ: Այս մասին գրում է РИА Новости–ն:

Մենենդեսից պահանջվել է 100 հազար դոլար գրավ, նրա կնոջ համար՝ 250 հազար դոլար։ Վերջիններս ենթարկվել են ճանապարհորդական սահմանափակումների։ Մասնավորապես, սենատորին թույլատրվում է արտասահման մեկնել միայն պաշտոնական գործերով։ 

Ամուսինները պետք է հանձնեն իրենց անձնական անձնագրերը։ Նրանք հսկողության տակ են մինչև դատը։ Հաջորդ հանդիպումը նշանակված է հոկտեմբերի 2-ին։

Նա իրեն մեղավոր չի ճանաչել կանխիկ և ոսկու ձուլակտորներով կաշառքներ ստանալու դաշնային մեղադրանքներում՝ եգիպտական ​​շահերը գաղտնի առաջ մղելու և տեղի գործարարներին ծառայություններ մատուցելու դիմաց իր քաղաքական ազդեցությունը օգտագործելու համար:

Մենենդեսն առաջին անգամ կանգնեց Մանհեթենի դաշնային դատարանի առաջ մի քանի օր անց այն բանից հետո, երբ դատախազները հրապարակեցին մասշտաբային կոռուպցիայի մասին մեղադրական եզրակացությունը դեմոկրատ սենատորի դեմ:

Մենենդեսն ասել է, որ մեղադրանքները, թե ինքը չարաշահում է իր լիազորությունները՝ գրպանները լցնելու համար, անհիմն են։ Նա ասել է, որ վստահ է, որ կարդարացվի, և մտադրություն չունի հեռանալ Սենատից:

Դատախազներն ասում են, որ Մենենդեսը բազմիցս Եգիպտոսի «ավտորիտար» կառավարության շահերից բխող գործողություններ է կատարել: Նրանք ասել են, որ Մենենդեսը նաև փորձել է միջամտել իր գործընկերների հետ կապված քրեական հետաքննությանը, և մի դեպքում պահանջել է Նյու Ջերսիում դաշնային դատախազ նշանակել: